Hain justu, Maria Ubarretxenak (Urretxu, 1980), Aintzane Oiarbide bailara-kidearen lekukoa hartuko du, bera izan baita Bide Azpiegituretako diputatua azken legegintzaldian. Era horretan, Mendozak azpimarratu du "belaunaldi berri baten lekuko aldaketa" irudikatzen dela: "Emakumeak gobernu arduretan gero eta gehiago parte hartzen dugu, eta bide horrek ez du atzera bueltarik. Lantalde sendoa eratu ahal izan dugu. Esperientzia duten pertsonen, eta freskotasuna eta ilusioa ekarriko dizkiguten aurpegi berrien nahasketa hori oso positiboa izango da legealdi honi baldintzarik onenetan eta berme guztiekin aurrera egiteko".
Aurrera begirako lanak
Ubarretxenari dagokionez, Arrasateko alkatea izan da azken bi legegintzaldietan, baina aurrez beste eremu batzuetan lan eginikoa da. Humanitate eta Enpresa lizentziaduna da Deustuko Unibertsitatean, eta Gipuzkoako Foru Aldunditik jakinarazi dute enpresen eta erakundeen esparruan "ibilbide luzea" eginikoa dela. Hala, aurrerantzean egin beharko duen lanaren berri eman dute: "Datozen lau urteetan errepide sare-moderno eta jasangarri bat finkatzeko lan egingo dugu, lurralde kohesioa bermatzeko, jarduera ekonomikoa bultzatzeko eta digitalizazioa eta berrikuntza txertatzeko, azpiegitura adimenduetara jauzi kualitatiboa eginez".
Gainontzeko diputatuak
Foru gobernu berriak 9 diputatu izango ditu, ahaldun nagusiaz gain. Orotara, 7 emakumezko eta 3 gizonezko izango ditu eta 7 kide izango dira EAJkoak eta beste 3 PSE-EEkoak.
Honakoak dira, honenbestez, Gipuzkoako foru gobernu berria osatuko dutenak:
- Eider Mendoza Larrañaga (Azpeitia, 1974), EAJ: Diputatu nagusia.
- Jose Ignazio Asensio (Tolosa, 1966), PSE-EE: Iraunkortasuneko diputatua.
- Maite Peña Lopez (Errenteria, 1975), EAJ: Gizarte Politiketako diputatua.
- Ane Insausti Altuna (Donostia, 1984), EAJ: Ekonomia Sustapen eta Proiektu Estrategikoetako diputatua.
- Azahara Dominguez Urtizberea (Irun, 1990), PSE-EE: Mugikortasuneko, Turismoko eta Lurralde Antolaketako diputatua.
- Maria Ubarretxena Cid (Urretxu, 1980), EAJ: Bide Azpiegituretako diputatua
- Goizane Alvarez Irijoa (Donostia, 1977), PSE-EE: Kultura, Lankidetza, Gazteria eta Kiroletako diputatua.
- Xabier Arruti Olazabal (Beizama, 1968), EAJ: Lurralde Oreka Berdeko diputatua.
- Irune Berasaluze Lazkano (Mendaro, 1968), EAJ: Gobernantzako diputatua.
- Jokin Perona Lertxundi (Orio, 1978), EAJ: Ogasun eta Finantza diputatua.
