Beste Bat Eguna egin zuten Arrasaten atzo, zapatua eta, urtero moduan, kirola eta festa uztartu zituzten eta antolatzaileak "oso pozik" azaldu dira egunak emandakoarekin. "Eguraldiak lagundu zigun eta oso parte-hartzailea izan zen eguna. Eskerrak eman nahi dizkiogu, bereziki, Basatikoei", adierazi du Angel Iriak, Beste Bat taldeko kideak. (Argazkiak: Beste Bat).
Basatiren eta Saint Pauliren arteko partiduarekin abiatu zuten eguna eta lehenak erabat nagusi izan ziren norgehiagokan (6-0). Ondoren, luntxa eta bazkaria egin zuten eta arratsaldean, kontzertuak izan zituzten San Andresko Equs tabernan. Halaber, Aido Doyle eta Aitor Iria ere izan zituzten gogoan. "Oso omenaldi polita izan zen eta eskertzekoa da", azaldu du Angel Iriak. Azpimarratzekoa da, gainera, arrasatearrak bakarrik ez, kanpotik etorritakoak ere aritu zirela egunaz gozatzen: "Batzuk Bermeotik etorri ziren eta beste batzuk, Galiziatik".
