Iturriperen birmoldaketa lehenesten du EAJk, "Musakola berritzen hasten denean kirola egiteko kiroldegia izan ahal izateko". Iturripen, kirol instalazioen barruan, bi kantxa, padeleko bi pista, makinen gimnasio bat eta erabilera askotariko hiru areto egongo lirateke, eta kanpoaldean, bi frontoi erdi itxi, kirol askotariko bi pista, skate parke bat eta atletismoko pista bat. Azaldu dutenez, 2023 amaieran hasi nahi dituzte lanak.
Jarraian egingo lukete Musakolako kiroldegiko obra. Barruko igerileku handi bat eta txiki bat, spa bat, kanpoko igerileku bat eta berdegune bat, erabilera askotariko kantxa bat eta harmailak, rokodromoa, padeleko bi pista, teniseko bi pista, taberna, tatami espazioa, bost areto balioaniztun, makina-gimnasio bat eta klubetarako beste bat. Lan horiek 2025ean hasiko liratekeela adierazi dute.
Horrez gain, hainbat eskolatako kirol instalazioak hobetuko lituzkete, espazioak hobetzeko helburuarekin, eta Mojategiko atletismo pista eta errugbi zelaia ere berrituko lituzkete, "Arrasaten kirola egin ahal izateko aukera zabalduz, instalaziorik onenekin". 2024 eta 2025 artean egin gura dute hori.
Kirol taldeak sendotzea helburu
Halaber, kirol elkarteak biziberritu, egonkortu eta sendotzeko plan aitzindari bat jarri nahi dute abian. "Herritarren parte-hartzea sustatuko dugu kirol taldeetan, taldeetan errelebo aldaketa sustatu taldeen biziraupena bermatzeko, baliabideak eskaini haien jarduna gauzatzeko, dirulaguntzak %30 handitu eta kirol eskaintza auzoetara eraman".
