Kultura indartzeko dituen proposamenak aurkeztu ditu EAJk

Eneko Azurmendi Barrena 2023ko mai. 24a, 14:40
Arrasateko EAJko zerrendakideak, Juan Arzamendi Musika Etxean. (Argazkia: EAJ).

Kultura "Arrasateko garapen eta proiekzio aktibo nagusietako bat" bilakatzea gura dute jeltzaleek eta hori eragileekin elkarlanean egin gura dutela adierazi dute. "Monterrongo parkeko agertokia eta harmailak erabat berrituz ekingo diogu lanari".

Kulturola eta Juan Arzamendi Musika Etxearen ondoren, Monterrongo parkeko agertokia eta harmailak berritzeko konpromisoa hartu du Arrasateko EAJk. "Gure herriaren erdigune historikoan dugun espazio naturala eta aire zabalekoa paregabea da eta etekina atera nahi diogu. Espazioaren egokitzapen garrantzitsua egingo dugu, ekitaldi soziokulturaletarako erabilera zabaldu ahal izateko", dio Maria Ubarretxena alkategaiak.

Arrasate "bizirik" nahi dutela gaineratu du. "Harro gaude daukagunaz eta egiteko gai garenaz, eta harro gaude aktiboki parte hartzen duten herritarrez. Arrasate ekitaldien erakusleihoan jarri behar dugu orain eta, horretarako, ekitaldien kudeaketa indartu eta udalerrira hitzordu interesgarriak ekartzeko lan egingo dugu".

Kultura eragile gehienak Kulturolan kokatu direnez, Ubarretxenarentzat "funtsezkoa" da hainbat diziplinen arteko aliantza-sare bat sortzea eta, batez ere, kultura-sorkuntza sustatzea eta babestea. "Baliabide publikoak izango ditugu erronka berri horiei aurre egiteko".

Tourraren inpaktuaz

Halaber, Frantziako Tourra Arrasatetik pasatzen dela baliatuz, zera adierazi du: "Zer egiteko gai garen erakusteko aukera paregabea da. Gure udalerria, zer garen, gure kultura eta gure ondarea zabaltzeko aukera aparta. Halako ekitaldiek beti dute onura bat herriarentzat, ekonomikoki interesgarria dena. Ekitaldi handiek eta baita horren handiak ez direnak ere. Adin guztietarako ekitaldiez ari naiz. Entretenitu, ekonomia bultzatu eta kaleetan dinamismoa sortzen dutenak".

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak