Ekainaren 3an, zapatua, egingo dute lehiaketa, XXIV. Harreman Elkartasun Egunaren baitan, 18:00tatik aurrera. "Inguruko harakinen tripakiak zein hanburgesak dastatu ahal izango dira, baita sagardoa ere", adierazi dute antolatzaileek.
Gipuzkoako harategi guztiei zuzenduriko lehiaketa da, tripaki hoberenen bila. Harategiek, lehiaketan parte hartu nahi badute, maiatzaren 29a baino lehen eman beharko dute izena, ederto@ederto.com helbidera mezu bat idatzita, 943 86 53 52 telefonora deituta edo 671 64 34 88 zenbakira WhatsApp bat bidalita.
Hainbat baldintza
Behin izena emanda, ekainaren 2an, harategitik jasoko dizkiete lehiaketara aurkeztuko dituzten tripakiak. "Guztira 750gr aurkeztu beharko dituzte; horietatik zati bat epaimahaiak dastatu eta epaituko ditu, eta gainontzekoa mokadutxoetan salduko da", azaldu dute.
Lehiaketara aurkezturiko tripakiek ezingo dute muturrik eraman, ez behintzat ikusteko moduko zatietan. Birrinduta, saltsa moduan bada, onartuko da muturrak erabiltzea. "Gainontzean, libre uzten da errezeta".
Sariak eta ohorea
Gipuzkoako harakinek eginiko tripakiak baloratuko ditu epaimahaiak, hiru onenei saria emanez. Epaimahaikideei dagokienez, Josema Azpeitia kazetari gastronomikoaren partaidetza baieztatu du antolakuntzak. Gainera, Ibai-arte eta Ederto-Harakel elkarteetako ordezkariak ere izango dira balorazio lanetan.
Harategi irabazleak txapela eta trofeoa lortuko ditu eta bigarren zein hirugarren gelditzen direnek, trofeoa. "Dena den, sari sinbolikoez aparte, Gipuzkoako tripaki hoberenak egitearen ohorea dago jokoan".
