2019ra arte Arizmendik antolatutako Abesbatzen Topaketa ordezkatuko du ekitaldi horrek. Eta honako guneetako ikasleak elkartuko dira: Umezaintzako 4 eta 5 urtekoak, Gazteluondoko lehen hezkuntzako bigarren mailakoak, Santa Teresako lehen hezkuntzako bosgarren eta seigarrenekoak, eta Gazteluondo eta Gaztelupeko lehen hezkuntzakoak eta DBHkoak.
Lau gunetan
Ikasleek lau gunetan kantatuko dute, eta eguraldiaren araberako bi ibilbide antolatu dituzte. Eguraldi ona egiten badu honakoa izango da ibilbidea: Seber Altube plaza, Arbolapeta, Herriko Plaza, Uarkape eta Biteri plaza. Aldiz, euria egiten badu aterpetan egingo dute kantuan: Uarkapeko arkupea, Jokin Zaitegi plaza, udaletxeko arkupea, parrokiako arkupea eta Biteri plaza.
Abestuko dituzten kantuen artean daude Isil-isilik dago, Astoa ikusi nuen, Azokara joan nintzen, Aldapeko eta Aitorren hizkuntz zaharra. Jaialdiari amaiera emateko, Bizitza kantu bat da eta Behin betiko kantuak abestuko dituzte ikasle guztiek batera.