Udaletik azaldu dutenez, erorikoak dira lesio eragile nagusiak EAEko 64 urtetik gorako adinekoetan. "Datu epidemiologikoen arabera, gutxienez urtean behin erortzen dira talde horretako pertsonen erdiak; eta ondorio fisikoak ez ezik, psikologiko eta sozioekonomikoak ere izaten dituzte".
Arazo horren garrantzia kontuan hartuta, erorikoak prebenitzeko tailer bat antolatu dute Arrasateko Udaleko Gizarte-zerbitzuetako Sailak eta Kirol Sailak, Osakidetzaren Osasun-zentroarekin, Arrasateko Farmazia-Ortopedia batekin eta Eusko Jaurlaritzaren Osasun Sailarekin elkarlanean. 65 urtetik gorako pertsonei eta euren senide edota zaintzaileei zuzenduta egongo dira saio horiek, "erorikoen kopurua gutxitzeko asmoz".
Etxaluze eraikinean egingo dute tailerra, bi saio teoriko-praktikotan, maiatzaren 24 eta 25ean, 16:30etatik 18:00etara. "Bertan azalduko dira, besteak beste, zergatik gertatzen diren istripu horiek eta zer egin aurrea hartzeko, zer garrantzizkoak diren ohitura osasungarriak eta ariketa fisikoa, edota nolako laguntza teknikoak dauden eskuragarri".
