"Euskal hezkuntza sistema publiko burujabea" eraikitzeko bidean, ikastolen ikastetxe eredua eta eskola publikoaren sen berdinzalea uztartzea da biderik eraginkorrena, Otxandianoren esanetan. Era berean, sare bakoitzaren "autoerreferentzialtasunean" sakondu baino, sistema osoa eraldatzeko garaia dela dio. "Jauzi honek, EH Bilduk proposatzen duen estrategiaren lehen estadioan utziko gintuzke: Euskal Hezkuntza Zerbitzua egonkortuta". Fase horretan, eraldaketa pedagogikoan, inklusioan, euskara eta euskal kulturan eta Euskal Herrian ardaztutako eraldaketarako helburu eta estrategiak azaldu ditu.
Arrasateko EH Bilduren ardatzetako bat
Halaber, Arrasateko EH Bilduk datozen lau urteetarako osatutako herri programan ardatzetako bat da hezkuntza. "Herri kohesioan, aukera berdintasunean, euskara eta euskal kulturaren transmisioan eta finean Arrasate hezitzaileago baterako norabidean lan egiteko konpromisoa hartuta, hezkuntza formaleko eragileen arteko kooperazioa eta hezkuntza ez-formalarekin uztarketa bilatzeko ekosistema hezitzaile bat eratzea izango da helburua", azaldu dute koaliziotik.
Hezkuntza arloan, honako hauek dira Arrasateko EH Bilduren proposamenak: "Udal Eskola Kontseilua aktibatu (ikastetxeak, tokiko elkarteak, udala) eskola eskaintzaren banaketa eta ikasleen eskolaratze orekatuan eragiteko; Arrasatek-Hezi proiektua berreskuratu, eguneratu eta egungo beharretatik garatu, herri hezitzailearen filosofia landu eta hezkuntza teknikariaren figura berreskuratu".
Azkenik, koaliziotik azpimarratu dute hezkuntza herri gisa amestu, landu, eraiki eta ekiteko eremua dela sinetsita daudela eta zentzu horretan EH Bilduk dagokion arduraz jarduteko konpromisoa hartua daukala.
