Sexu eta genero aniztasuna aldarrikatzen duen Zinegoak jaialdiaren edizio honetan zazpi film labur ikusi ahal izango dira, jatorrizko bertsioan eta azpitituluekin, euskaraz eta gaztelaniaz. Hiru film euskal sorkuntzak dira eta euskaraz proiektatuko dira; gainerakoak Espainian, Libanon, Brasilen edo Iranen sortuak dira. Proiekzioaren ondoren solasaldi bat egingo dute, Xabier Vallinak, LGTBIQ+ mugimenduko aktibista eta zinemagile arrasatearrak, gidatuta.
Jaialdia ekainean izango da, baina aurrez Arrasaten ikusi ahal izango dira aukeratutako filmak. Hala, Emakume Txokoak proiekziora joateko eta kalitatezko zinema kritikoa ikusteko aukera aprobetxatzeko gonbita egin die herritarrei, LGTBIQ+ errealitate aniztasuna jorratuz.
Tailerrean izena eman behar da
Bestalde, maiatzaren 13an, Betaurreko binarioak apurtzen: aniztasunaz jabetzen tailerra egingo du Histeria taldeko Udane Hermosilla Fernandezek, Emakume Txokoaren Jabekuntza Eskolaren baitan. 10:00etatik 13:00era izango da, Emakume Txokoan, eta generoak eta desioak estereotipatzen dituzten betaurrekoen bidez mundua nola behatzen den aztertuko dute, "modu kritikoan".
Sexu eta genero aniztasunari buruz gehiago jakin nahi dutenentzako gune bat izango da tailerra eta izena eman beharko da aurrez, Emakume Txokoan bertan.