Txomin Duhalde, Arnaud Labastierre eta Eric Lecordier musikariek 2015ean osatu zuten Hirukote taldea, Lapurdin. Euskal Herriko kantu eta dantza herrikoiak moldatuz, swinga dute langai, eta hurrengo hilabeteetan lehen diskoa grabatzeko asmoa dute. Dmitry Baevsky saxofoi-jotzailea izango dute gainera lagun. Errusiarra da, baina New Yorken ari da bere ibilbidea egiten. 19:00etan izango da kontzertua, Arbolapetan.
Iker Martinez musikari oñatiarra, berriz, Zaldi Herrenak taldearekin arituko da. Azaldu dutenez, rock lasaia, pop-a eta country-a da, besteak beste, lantzen duten musika, eta era horretan "bidaia musikal bat proposatzea" dute helburu. 13:00etan izango da kontzertua, herriko plazan.