Ikus-mina zegoen Ibai-arteren bigarren moda desfilerako, eta bete egin da plaza. 19:00etan hasi da, baina egon da jendea 16:00etarako lekua hartu duenik, eta eguraldiak lagunduta arratsalde pasa ederra egin dute. Arrasateko dendek eskaintzeko dutena ikusteko aukera izan dute bertatik bertara.
Imanol Gallegok aurkeztu du desfilea eta herritarrek egin dituzte modelo lanak. Esan daiteke, beraz, 0 kilometroko desfilea izan dela. Fotocall-a ere egon da eta desfile osoa streaming bidez ikusteko aukera izan da. Gonbidatu moduan, Bergarako Candem Town dantza akademiako Arima taldea aipatu behar da.
Ordu eta erdi inguru iraun duen ekitaldian jantziak, bainu-jantziak, barruko arropa, oheko arropa, betaurrekoak, oinetakoak, askotariko osagarriak eta euskal jantziak izan dira besteak beste ikusgai. Troko, E&G, Kapikua, Sikol, Portaloi Optika, Bea Lentzeria, Elkoro Bisuteria, Intersport Loramendi, Tipi-Tapa, Ennea, Resusta Karrikiri, Josle, Markiegi, Kili-Kolo, eta Oskarbi Oinetakoak komertzioetan aurki daitezkeen produktuak guztiak.
Ibai-artek antolatutako bigarren desfilea arrakastatsua izan da, eta plazan egin ahal izateak glamour handiagoa eman dio. Lan handiko egunak izan dira elkartearendako, merkatariendako eta modeloendako, baina gustura egoteko moduan dauden. Seguruenik izango da hirugarren desfile bat ere.
