Aste Santuko oporrak tarteko, apirileko azken bi eguenetarako proposamenak egin ditu Kooltur Ekintzak taldeak. "Publiko gaztearen eta pop-zaleen artean egon den sorpresa bitxienetako bat da Berako Janus Lester musikaria. Kontzerturik eman barik ezagun egin zen bakarlari moduan, eta gaur egun taldearekin ari da zuzenekoetan. Oinarrian popa euskaraz egiten dute, baina baditu musika beltzaren ukituak ere", dio antolatzaile taldeko Iker Barandiaranek.
Kokein taldea apirilaren 27an
Zaloa Urain abeslariak gidatzen duen boskoteak hartuko du azken eguenean lekukoa Arrasateko gaztetxeko taularen gainean. "Talde beteranoa da; zazpi disko dituzte argitaratuta; azkenekoa, iaz, Atomika, Mauka Musikagintzaren eskutik. Rocka zentzu oso zabalean lantzen du boskoteak eta zuzeneko indartsuak egiten ditu".
