Atzo, Martxoaren 8a, Emakumeen Nazioarteko egunean Kooperatiben Kontseiluak eta Konfekoopek Mondragon Korporazioko Batzorde Iraunkorreko eta Kongresuko presidentea den Leire Mugerza (Mutriku, Gipuzkoa, 1976) saritu zuten berdintasunaren alde egin duen lanarengatik. Kooperatibetan parekidetasunaren eta emakumeen ahalduntzearen alde egin du lan Mugerzak. 25 urte baino gehiagoko ibilbidea du mutrikuarrak kooperatibetan eta aitortza jaso zuen urte hauetan erantzukizuneko karguetan beste emakumeei ateak zabaltzeagatik. Gasteizko Goiuri jauregian ospatu zen ekitaldian, Bidegintza eta Edi kooperatibek ere errekonozimendua jaso zuten.
Ekitaldian izan ziren Bakartxo Tejeria Eusko Legebiltzarreko presidentea, Idoia Mendia lehendakariorde eta Lan eta Enplegu sailburua, Maider Echevarria Gasteizko Udaleko alkateordea, Nerea Melgosa Berdintasun, Justizia eta Gizarte Politiketako sailburua, Rosa Lavin Konfekoopeko presidentea eta Belen Balerdi Kooperatiben Kontseiluko idazkari nagusia.
Leire Mugerza, bidelagun izan dituen pertsonak izan zituen gogoan TU Lankideri egindako adierazpenetan: "Nik jasotzen dudan aitorpena da, baina posible egin duten pertsona guztientzako errekonozimendua dela sentitzen dut". Era berean sariak Mondragoneko kooperatibetan bizi duen errealitate bati "ikusgarritasun" handiagoa ematen diola gaineratu zuen.