Festa da nagusi Arrasateko Al-Andalus zentroan. Sevillanak dantzatzeko dotore jantzita daude asko, beste batzuk ikuskizunaz eta festa giroaz gozatzera gerturatu dira. Egiari zor, festa giro aparta dago Arrasateko zentroan eta ateak zabalik dituzte guztiendako.
Alegria de la Sierra taldearen emanaldiarekin hasi dute eguna. Ondotik, zentroko Lourdes Oncala sevillana eskolako kideek egindako erakustaldia izan dute. Txalo zaparrada artean hartu dituzte; gustura ikusleak eta gustura, baita ere, sevillana dantzariak. Hainbat saio egin dituzte astetik astera eta urtetik urtera ikasitakoa balioan jarriz. Pozik zen Lourdes Oncala irakaslea ere.
Egun osoko egitaraua
Bazkariaren ostean arratsaldeko saioak etorriko dira. Lehenengo eta behin Maledantza dantza taldearen ikuskizuna dago iragarrita 19:00etarako, eta ondotik afaria. Ehundik gora lagun elkarteko direla azaldu du Al-Andalus elkarteko presidente Salva Delgadok. "Luze joko du gauak gaur hemen", azaldu dute. "Gorputzak eusten dion bitartean egingo dugu kantuan eta dantzan".
