Martxoaren 2an, eguena, egingo dute lehenengo bilera, 18:00etan, Kulturolan, hiru plazetan bizi diren herritarrekin. Martxoko hurrengo asteetan, plaza bakoitzeko bizilagunekin egingo dituzte saioak eta prozesuaren bilakaeraren arabera, beste saio batzuen beharra aztertuko dute. Prozesua Emun aholkularitza-enpresarekin lankidetzan garatuko dute.
Udal Gobernuak azaldu duenez, helburua da Grupo San Juan osatzen duten hiru plazen berrurbanizazioak oinarrian izan beharko dituen irizpideak erabakitzea. "Horien gainean gauzatuko dugu hiru plazen berrurbanizaziorako proiektua".
Hainbat berbagai izango dituzte bileretan: plazen izaera, horien arteko harreman fisikoa, espazioen kalitatea, gabeziak eta eremuko espazio publikoen etorkizuna, besteak beste. "Horien inguruan hausnartu, eztabaidatu eta, ahal den heinean, adosteko foro gisa planteatu ditugu parte-hartze saio horiek".
Proposamenak, eredu gisa
Udal Gobernuak hainbat proposamen sortu ditu, "erreferentzia gisa" erabiltzeko, baina "inola ere" ez dira itxiak izango. "Hala, plaza bakoitzak bere aldetik landu ahal izango ditu bere gerorako desirak, baina ahaztu gabe badirela hiru plazak lotzen dituzten gaiak ere. Gainera, etxe-taldea herriguneko hiri-bilbearen bihotzean dagoenez, gainerako herriarekin izango duen harreman urbanoa ere kontutan izan beharko da prozesuan", nabarmendu dute Udal Gobernutik.
