Pista estaliko Espainiako Kluben arteko Kopa edo Iberdrola Kopa jokatu da gaur Ourensen, eta pertika-jauzian, gorenean egon dira beste behin arrasatearrak. Axpek Atletico San Sebastian taldearendako lortu ditu puntuak txapelketa honetan, eta Ruiz de Azuak Valentziako klubarendako.
4,40ko markara iritsi diren bakarrak izan dira Arrasateko atletak, eta Maialen Axpek lehenengo saiakeran lortu duenez, berak eraman ditu bere klubarendako puntu gehien. Malen Ruiz de Azuak bigarrenean lortu du marka, eta horregatik geratu da bigarren sailkatua.
Marka gainditu ostean, Ruiz de Azua 4,45 metroak gainditzen saiatu da, baina ezin izan du hiru saiakeretan. Axpek, bere hiru saiakerak 4,50ko altuerarekin egin ditu, baina hiruretan kale egin du.
Hurrengo astebukaeran Espainiako Txapelketa izango dute jokoan Ruiz de Azuak eta Axpek, eta biak ala biak, sentsazio onekin iritsiko dira, 4,40ko marka erdietsita.
