Ludoteka ibiltarian 3 eta 12 urte arteko haur eta aurre-nerabeek izango dute parte hartzeko aukera, baita horien arduradun edo gurasoek ere. Ekintzak parte-hartzaileekin batera adostu eta denen gustukoak antolatzen saiatuko direla aurreratu dute antolatzaileek.
Era berean, nabarmendu dute, aisialdi hezitzaile euskaldunaz gozatzeko aukera paregabea dela, "parte-hartzaileei sormena garatzeko, harremanak egiteko, parte-hartzea sustatzeko, naturarekin harremantzeko eta beste hainbat helburu hezitzaileri bide emanez".
Musakola auzoan hasiko dute ludoteka ibiltaria. Honako hau da egutegia:
- Musakola auzoan: otsailak 4, 11, 25 eta martxoak 4.
- San Andres auzoan: martxoak 11, 18, 25 eta apirilak 1.
- Erguin auzoan: apirilak 22 eta 29 eta maiatzak 6 eta 13.
Musakolari dagokionez, gaztetxoko atarian elkartu eta, 11:30etik 13:30era, ludotekaz gozatzeko aukera egongo da, "bi hezitzaileren bide-laguntzaz, material eta baliabide ezberdinak parte hartzaileen eskura jarriz".
Inauteri asteburuan, otsailaren 18an, ez dute zerbitzua eskainiko, herrian beste hainbat ekintza izaten direlako, eta udaberriko oporretan ere ez da egitasmoa gauzatuko.