"Desiatzen" zeuden auzoko jaiak ospatzeko, hiru urtean ezin izan dute antolatu eta. Baina aurten bai, eta "erantzun apartarekin", gainera. Halaxe azaldu du Meatzerrekako auzo alkate Inaxio Zuazubiskar. Ostiralean bertsolariek ireki zuten jaietako egitaraua, Ane Zuazubiskar arrasatearrak eta Peru eta Martin Abarrategi aramaioar anaiek. Gauean mus txapelketa egin zuten, "sekulako parte hartzearekin". 26 bikoteren artean txapela etxean geratu zen, Andoni Beitiak eta Jon Elkorok jantzi baitzuten, biak herriko gazteak.
Zapatuan auzo bazkarira 40 bat lagun arrimatu ziren bakailaua jatera. Arratsaldean gaztetxoek Lopene ganadutegiko zaldi eta bigantxekin ederto pasa zuten elkarte alboko patioan. Euria egin arren, ez ziren kikildu animalien aurrean, eta txokolate beroa hartu zuten gero. Gauean, berriz, Kontralde taldeak kontzertua eman zuen elkarte barruan.
Eta gaur, domeka legez, meza egin dute San Balerio ermitan, Gesalibarko eta Garagartzako koruek lagunduta. Eguerdiko 12:00etan, berriz, Txikitxu-Arrostaitz dantza taldekoek txistularien doinura dantzatu dute, ordubete inguruko saioan.
Horrela esan diote agur 2023ko San Baleixo jaiei. Auzo alkatearen iritziz, auzotarrak eta ingurukoak bata bestearekin egoteko "hitzordu garrantzitsua" izan da. Etorriko dira gehiago.