"Biznagaren kontzertu batera joan ginen taldeko baxu-jole Txebi eta biok eta handik irtendakoan Oñatin eurekin kontzertu bat antolatzeko ideia izan genuen; heldu da eguna eta sekulako ilusioarekin gaude", dio Motz taldeko Xabi Elortza Txirli gitarra-jolea.
Argitaratu berri duten Bremen no existe laugarren bilduma aurkeztuko dute madrildarrek Oñatin, Gasteizko Helldorado aretoan gaur gauean eta bihar eguerdian egingo dituzten emanaldien ostean. "Melodia handia duen punk-rock taldea da, landutako hitzekin osatutako kantuak dituena; proposamen freskoa", dio Elortza.
Oñatiko Motz, Arrasaterko Perlata eta Madrilgo Biznaga bihar, zapatua, Oñatiko gaztelekuan
Anfitrioi eta taularen gainean
Xabi Elortza Txirli gitarra-jolea, Jabi Bujanda Txebi baxu-jolea, Joseba Azkarate bateria-jolea, Ima Ugarte gitarra-jolea eta Xabier Pascual Pasku dira Motz taldeko kideak. "Pandemian gitarrarekin probatzen hasi nin- tzen eta auto-istripu baten ondorioz urte batzuetan bateria albo batera utzita zuen Josebarekin elkartzen hasi nintzen haren etxean. Hasierako asmoa ez zen taldea sortzea, baina beste hiru kideak batzen joan ziren, poliki-poliki, eta, harrezkero, zazpi kontzertu egin ditugu. Oso harreman ona dugu eta musika daramagu guztiok barruan. Ondo pasatzea da asmoa".
Rock melodiko doinuekin jantzitako hitz zorrotzak dira Motzen ezaugarri. "Hamabost bat eskainiko ditugu ordubete pasako emanaldian, gureak eta aurrez ibili izan garen taldeen bertsioak nahastuta".
Perlata ere "gogotsu"
"Pozarren" onartu zuten gonbidapena Arrasatekoek. "Gustuko ditugu bi taldeak eta deseatzen gaude taularen gaina partekatzeko. Perlata inoiz baino indartsuago dago, gauza berriak egiten eta egiteko gogoz. Txerra Bolinaga da orain gure bateria-jolea. Oso pozik gaude eta asko dugu elkarrekin emateko, eta hasi gara abesti berriak prestatzen ere. Dokumental bat be badugu esku artean, aurrerago kontatuko duguna". dio Perlatako kide Ane Garaik.
Sarrera gutxi geratzen dira
Zortzi eurotan daude sarrerak Txokolateixan eta Oñati.eus atarian eskuragarri eta hamar eurotan izango dira bihar gaztelekuko leihatilan. "Sekulako erantzuna jaso dugu eta oso ondo doa salmenta; gutxi geratzen dira. Aurrez iragarri moduan, leihatilarako gorde ditugu sarrera batzuk, baina ez dira asko izango", dio Txirli-k.