Zarautz, Hondarribia, Eibar, Ordizia, Donostia, Mutriku eta Arrasateko 14, 16 eta 18 urte azpiko errugbi jokalariak elkartu dira gaur goizean Mojategin, elkarrekin entrenatzeko. Elkarren aurka jokatzen dute normalean, baina elkarrekin jokatuz senior mailara heltzea da helburua, eta arerio izan barik taldekide izan dira gaurko entrenamendu saioan.
Arrasate Errugbi Taldeko Belen Aranbarrik azaldu du topaketa honen helburua: "Gipuzkoan, egun, hamar talde daude errugbian jokatzen dutenak, baina neskak, ez dira asko; zailtasunak daude talde bakoitzean senior mailara heltzeko. Aldundiak proposatu digu Gipuzkoa mailan talde bat sortzea, gero Estatura edo Frantziara lehiatzera joateko. Zortzi talde sartu gara hor. Eta topaketa honen helburua da elkar ezagutzea". Joan den urtean hasi ziren egitasmo hau lantzen: "Lehiaketa batzuk egin zituzten eta Iparralden ere egon ziren. Hangoek maila handia dutela ikusi zuten, baina gogotsu daude hauek ere".
"Arrasaten badago senior taldea, inklusiboan ere badaude neskak eta amen taldea ere sortu da. Mugimendua badago, ari gara lantzen nesken munduan errugbiari beldurra kentzearena. Hori da gure lehia", gaineratu du Aranbarrik.
