Peru Abarrategi, Xabi Igoa eta Ane Zuazubiskar bertsolariek girotuko dute jaiei hasiera emango dien pintxo-potea, urtarrilaren 27an, 19:30ean.
Egubakoitz horretan, 22:30ean hasita, XL. Mus Txapelketa egingo dute Meatzerrekako elkartean, zortzi erregetara. Izen-ematea 30 euro izango da bikote bakoitzeko eta 18:00etatik aurrera egin ahalko da. Sariei dagokienez, honako hauek izango dira: irabazleak txapela gazta eta diruaren %50 eramango du; bigarren sailkatuak, gazta eta diruaren %25; hirugarrenak, diruaren %15 eta laugarrenak diruaren %10.
Zapatuan, auzo bazkaria egingo dute 14:30ean eta 17:00etan, Lopene ganadutegiaren eskutik, zezen txikien eta ponien ikuskizuna egongo da. 18:30ean, berriz, txokolate-jana egingo dute ume eta gazteek. 21:00etan, azkenik, Kontralde taldeak kontzertua egingo du.
Domekan, azkenik, meza egingo dute 10:45ean San Baleixo ermitan, Gesalibarko eta Garagartzako abesbatzek lagunduta. 12:00etan, Txikitxu-Arrostaiz taldekoek euskal dantzak egingo dituzte elkartean. Ostean, luntxa edukiko dute dantzariek eta 14:30ean bukatuko dituzte jaiak.