Partidu borrokatua jokatu dute Iturripen Mugarri Ingouk eta Aritzbataldek. Lehenengo zatian, epaileen erabakiek asko baldintzatu dute jokoa; izan ere, bi minutuko kaleratze asko egon dira. "Zortzi minutu egon gara jokalari bat gutxiagorekin", esan du Mugarri Ingou taldeko Jurgi Iraolak. Atsedenera markagailuan atzetik joan dira etxekoak: 13-14.
Tentsio handia
Bigarren zatian indarberrituta irten dira Ane Herreroren mutilak. Defentsan egindako lanak aurkaria mendean hartzeko balio izan die. Markagailuan aurretik jarri dira eta pare bat goleko abantaila ere izan dute. "Zarauzkoa talde bizkorra da, txikiak dira eta korrika asko egiten dute. Horri eustea izan da gure lana", nabarmendu du Iraolak. Partiduko azkeneko minutuak tentsio handikoak izan dira: bi taldeek izan dute garaipena lortzeko aukera. Hala ere, etxekoek izan dute eskuren: azkeneko 10 segundoetan 28-27 aurretik zihoazen.
Azkenean, 28-28 izan da emaitza.
Ondo egindako lana
"Denboraldia oso ondo hasi genuen, baina Gabon aurretik behera egin genuen... Gabonetako oporrak oso ondo aprobetxatu ditugu, ondo entrenatu dugu eta gaur igarri da hori. Oso ondo joka dezakeen taldea gara. Gaurko partiduak konfiantza hartzeko balioko digu", gehitu du Iraolak.
