Ekiola Ointxe! kadete mailako taldeak denboraldi ederra egin du ligan, eta Gipuzkoako lehenengo mailako ligako txapeldun izan dira. Hala, otsailean hasiko duten Euskal Ligara igotzea lortu dute, baina hori ez da egindako lan onaren sari bakarra. Izan ere, asteburuan Espainiako Txapelketara joateko txartela izango dute jokoan, Iturripen jokatuko dituzten partiduetan.
Zapatuan, 12:30ean, arrasatearrek Arabako talde txapelduna izango dute zain, eta talde onena domekako finalera sailkatuko da. Hain zuzen, beste finalerdia Ordiziak –Gipuzkoako bigarren sailkatua izan da– eta Barakaldok jokatuko dute –Bizkaiko txapeldunak–.
Hamalau garaipen ligan
Ikusteko dago arrasatearrek urtea borobiltzen duten, baina orain arte ikusgarri ibili dira. Ligan jokatutako hamalau partiduak irabazi dituzte, oso joko maila ona erakutsita. Batazbeste 80 puntu eskuratu dituzte partiduko, eta 27 puntu baino ez dituzte jaso.
