Familian jolasean ekimenaren beste edizio bat jarriko du martxan domeka honetan, hilak 15, Udaleko Gazteria Sailak, Txatxilipurdirekin, Arrasateko udal ludotekekin eta Gipuzkoako Haur Txokoekin elkarlanean. 0-8 urte arteko haurrak dituzten familiek elkar ezagutzeko eta elkarrekin jolasteko aukera ematen du egitasmoak, aniztasuna kontuan hartuta eta euskararen transmisioaren garrantzia azpimarratuta. "Asmoa da neguko domeketan espazioa, denbora eta hitzordua eskaintzea familiei, elkarrekin parteka dezaten jolasa eta kalitatezko aisialdi hezitzailea", azaldu dute Udaletik.
Domekero, eten barik
Bi hezitzailek dinamizatuta, hamaika saio egingo dituzte, guztira; horietako bederatzi, Okendoko ludotekan. Beste biak Santa Marinakoan eta Usaetxekoan izango dira: bata otsailaren 26an eta bestea martxoaren 26an.
Informazio gehiago jasotzeko edo ekimenean izena emateko, ludoteketara bertaratu daitezke gurasoak.
