Osakidetzaren asmoa da ospitalearen lehen egoitza izandako eraikina botatzea pabilioi berri bat eraikitzeko han. Pabilioi horren bidez eguneko ospitale mediko-kirurgikoa handitu eta endoskopia-zerbitzua eskainiko duen digestio-unitate berri bat eta errehabilitazio-zerbitzu berri bat sortu eta erresonantzia magnetikoko gela bat integratu ahal izango da ospitale barruan. Gainera, larrialdi-zerbitzurako base berri bat egingo da eta kanpoko kontsulten eremua handitu ere bai, Osakidetzatik jakinarazi dutenez. 100 plazako lurpeko aparkaleku bat ere aurreikusi dute.
Proiektuak 25 milioi euroko inbertsioa beharko duela gaineratu dute.
Eraispen-lanek martxora arte iraungo dute, eta adierazi dutenez ospitaleko asistentzia jarduerarekin bateragarriak izango dira. Obrak lizitatu eta esleitu aurreko exekuzio-proiektua datorren udarako prest egongo da.