Gaitasunik ezagatik baino gehiago, Mondraren bolada txarrak zamatik izan du asko. Liga txarto hasi eta bizkar gainean pilatzen joaten den zama. Egon dira gainetik pasa diren taldeak – Hernaniren kontrako 5-0ekoa, esaterako–, baina beste partidu asko tarte txikiagatik galdu dituzte, eta gehiago merezi izan dute.
Hala, Tolosaren kontra ligako lehen garaipena eskuratu ostean (1-0), aste barruan talde zuri-moreak entrenatzaile berria aurkeztu du. Jorge Santiago kirol zuzendariak hilabetez jardun du prestatzaile moduan; hortaz, haren testigua jasoko du David Muñozek. Arrasatekoek Elgoibarren jokatuko dute, zapatuan (18:00).
Vasconiari irabazita (4-2) arnasa hartu duen beste talde bat da Aretxabaleta. Haien bolada txarrak gutxiago iraun du, lau jardunaldi, baina nahikoa izan dira atzealdeko postuetara gerturatzeko. Tolosaren zelaian jokatuko dute bihar, zapatua (16:30).
Bergara ere zuloan
Agorrosin berrian jokatutako lehen partiduan 1-3 galduta, mahoneroek beste aukera bat izango dute zelai berriari neurria hartzen joateko. Sailkapenaren erdialdean dagoen Amaikak Baten bisita izango dute zapatuan 16:30ean. Bada, Aloña Mendik ere ez du nahi urtea azken asteotako zapore gaziarekin amaitu. Oñatiarrek galdu egin dituzte azken hiru partiduak, eta domekan etxean izango dute, Añorgaren kontra, 2022a ondo agurtzeko aukera (16:30.
Emakumezkoetan, Leintz Arizmendik eta Bergarak etxean jokatuko dute; biek izango dituzte erdialdean dauden taldeak aurrean, eta bereziki Bergara puntu beharrean dago, azken postuan dago-eta sailkapenean. Bergarak Lagun Onak hartuko du zapatuan (13:00) eta Leintz Arizmendik, Antiguoko (11:30, Azkoagain).