Gonzalo Nardiz 2022 sariak banatu dituzte gaur goizean, Iñigo Urkullu Eusko Jaurlaritzako lehendakaria eta Arantza Tapia Ekonomiaren Garapen, Jasangarritasun eta Ingurumeneko sailburua gidari zirela, eta Agustin Markaide arrasatearra eta Eroski taldeko presidente ohia izan da sarituetako bat.
Hain justu, Eroski taldean elikagaien banaketa-sektorean egindako lanarengatik egin diote aitortza, banaketa sektorea "lehen sektorearen garapenerako giltzarria" dela nabarmenduta. "Bertako produktuen, elikaduraren balio katearen eta kontsumitzaileen formazioaren alde egin duzun lana saritzen dugu".
Izan ere, nekazaritzako elikagaien katean eta Arabako, Bizkaiko eta Gipuzkoako landa ingurunean eginiko ibilbide profesional eta enpresarial "eredugarri eta luzea" aitortzeko asmoa du sariketa honek. 2003.urteaz geroztik egiten da, bi urtean behin, Nardiz sailburu ohia zenaren omenez.
Martinez eta Latxaga ere sarituak
Markaiderekin batera, Fernando Martinez laborari arabarra ere omendu dute, "nekazaritzan ibilbide luzea" egiteagatik, batik bat, olibondo laborearen balioa berreskuratzeko eginiko lanarengatik. Horrez gain, Iñaki Latxagak ere saria jaso du "pertsona ekintzailea" izateagatik. Albacora Taldea sortu zuen, eta adierazi dutenez egun atunaren arloan munduko liderretako bat da.
