Ttak taldeko kide Oihan Lotiren esanetan, saio horien helburua da gazte jendeari ikustaraztea euskaraz bizi diren erreferenteak badaudela, euskaraz sortzeko askotariko prozesuak egiten direla eta horien berri zabaltzea, gazteen arteko sortzailetasuna sustatzeko eta, aukeran, euskaraz aldarrikatzeko. Era berean, erreferente faltaren hutsunea tapatzen joateko ere baliatu gura dituzte saioak, "erreferente horiek euskaraz zelan bizi eta lan egiten duten erakusteko".
Bihar, eguaztena, Sastakai antzerki taldeko Idoia Tapiarekin eta Irati Velez antzerkigilearekin ariko dira, berritasun modura. Hala, hogei minutuko obra antzeztuko dute biek eta gero eurekin elkarrizketan ariko dira ikasleak.
Bigarren saioan, berriz, Unax Iñarra, Leire Etxezarreta eta Peru Altube izango dira gonbidatuak, herriko musikariak hiruak, eta mahai-inguru bat osatuko dute.
DBHko laugarren mailako eta Batxilergoko lehen urteko ikasleendako saioak izango dira eta, hasiera batean, behintzat, ikastetxeetako ikasleek izango dute lehentasuna.