Abuztuan, hainbat tresna lapurtu zituzten Arrasateko parrokiatik, besteak beste, abestien letrak proiektatzeko pantaila. Kalte horiek konpontzeko, "deialdi berezia" egin zuten domeka honetarako, On Jose Maria Arizmendiarrietaren heriotzaren 46. urteurreneko mezaren harira.
Hori dela eta, "normalean baino diru gehiago" batu zutela uste du Argaratek. Hala ere, dirua zegoen poltsa hori lapurtu egin zutela adierazi du parrokoak. "Herritarrek poltsan sartu zuten haien borondatea, eta sakristiara eraman aurretik, aldarearen magalean utzi genuen. Arizmendiarrietaren omenezko meza zenez, jende asko etorri zen kanpotik eta mugimendu handia egon zen. Antza denez, mugimendu hori baliatu zuen norbaitek poltsa hartu eta eramateko. Gu ez ginen ohartu meza bukatu arte". Salaketa jarri du parrokiak baina, oraingoz, ez dago berririk.