Talde ugandarraren ordu eta erdiko kontzertua bi zatitan banatu zen. Lehenengoan, gospel afrikar doinuak izan ziren entzungai; bigarrengoan, berriz, gospel amerikarra. Beste behin ere, Haurtxo txikia euskal kanta kantatu zuten, eta, Arrasateko Gazte Abesbatzarekin ere aritu ziren abesti batean. Ondoren, arrasatearren ahotsek musikatu zuten afrikar pieza bat.
Mundukide Fundazioko kide Urri Urizarrek adierazi du, guztia oso ondo atera zela: "Amaia antzokia bete egin da. Ia-ia sarrera guztiak saldu ditugu. Bertaratutakoek esan digute asko gustatu zaiela kontzertua. Arrasateko jendeaz aparte, bailarakoak ere etorri dira".
Landa garapena bultzatzen
Mundukide Fundazioak eta Harremanek landa inguruneko herritarren garapen sozioekonomikoa bultzatzeko proiektua du Mozambikek. Atzoko jaialdiarekin, laguntza ekonomikoa emateaz gain sentsibilizazioa bultzatzea izan zen helburua "hango egoera zein den ikusteko". Horregatik, kontzertuaren hasieran, Mozambikeko egoera islatzen eta egiten duten lanaren inguruko bideoa proiektatu zuten. Halaber, Mundukidek gogorarazi du proiektuari ekarpena egiteko aukera badagoela.