Ines Osinaga musikariak Itsasoa da bide bakarra bere bakarkako lehen lana aurkeztuko du hilaren 24an, eguenean, soinu organikoak eta produkzio elektronikoak batuta, baina dagoeneko aurrerapenaz gozatzeko aukera dago. Udaberrixan Habana izenpean ondu baitu abestietako bat, Lorea Argaraterekin batera.
Lana "bidaia luzeko abestiek" osatzen dute. "Habanan jaio eta Euskal Herrian hazi ziren hauetariko batzuk, tabako, ardo eta kanelaz. Bidaian sortu dira besteak, edo bidaia bera dira kantuak". Azaldu duenez, "doluaren aitortza bat da" proiektua, "aldaketari gorazarre bat eta zaurgarritasunari parez pareko begirada bat".
Era horretan, "espazioa konpartitzearen ariketa etengabea" egin du artistak proiektu honetan. "Guztia aldatzen baita gure artean hitz egitean, lehia miresmen eta aitortza bihurtzen dugunean".
