Mundukidek eta Harremanek gonbidatuta, palmares izugarria daukan boskoteak berriz bisitatuko du Amaia antzokia, duela hiru urte egin bezala. Musikariek gogoan dute orduko hartan arrasatearren aldetik jasotako harrera beroa, Haurtxo txikia-ren bertsio afrikarra abestu zutenean "benetan" hunkitu baitzen publikoa. Zapatuan ere, hilak 19, 19:30ean hasita, lepo beteko da aretoa, ez baita egunero ikusten nazioarteko hamaika sari irabazi eta Europako hamahiru herrialdetan 1.500 kontzertu baino gehiago eman dituen talde bat. Gainera, Goikobaluko gazteek lagunduko diete une batzuetan koruekin.
Landa garapena bultzatzeko
Mundukidek landa inguruneko herritarren garapen sozioekonomikoa bultzatzeko proiektua du Mozambiken, pobreziaren kontrako borrokan laguntzeko eta biztanleen diru sarrerak modu sostengarri eta bidezkoan handitzeko anbizioarekin. Egitasmo horri bultzada emango diote zapatuko ekitaldian.