Futbol eskolatik hasi eta Ohorezko erregional mailako taldeetarainoko jokalariak aurkeztu dituzte gaur goizean Mojategin: "Ez da erraza halako egun bat antolatzea, baina merezi du, polita da urtean behin denok hemen batzea", adierazi du zuzendaritzako beste kide batzuekin batera talde argazkiak antolatzen buru-belarri ibili den Xabier Etxeberria presidenteak. Mondraren harrobiari dagokionez gaur 27 talde batu dira Mojategin, alebin mailatik gorakoak 15 talde, eta futbol eskolako beste 12 talde.
Eta, Leintz Arizmendikoek ere hitzordua baliatu dute euren taldeak aurkezteko. Ohorezko erregional mailan diharduten taldekoek aurrerago egingo dute talde erretratua, baita futbol eskolako neskek ere, gaur ez dira Mojategin izan, baina bai izan dira harrobiko gainontzeko hiru taldetako ordezkariak, infantil mailakoak eta kadeteak.
