Maritxu Kajoi komisiñuak, beste urte batez, nobenaixua ospatu du, egun handiaren aurreko egubakoitzean, eta, aurten, San Andres auzoko jai batzordeari eman dio inbutu preziatua; besteak beste, herrian egin duen eta egiten duen lan guztia aitortu dute.
Komisiñoko kideen arabera, jai "eleganteak" antolatzen dituzte auzo honetako kideek, umeek, helduek eta adinekoek lekua duten festak. "Ez da lan eta meritu makala. Dena auzolanean, boluntario eta bihotzetik; beraz, jasoizue, merezimendu osoz, aurtengo Maritxu Kajoi komisiñuen inbutua".
Oiana Sanchez San Andresko jai batzordeko kideak, berriz, azaldu du "sorpresa handia" jaso zutela inbutua emango zietela jakitean. Dena den, batzordekideak taldean egiten duten lana nabarmendu du, hala nola horrek duen garrantzia azpimarratuta, eta baita bertan jardunean ari diren herritarrena ere. Are, azpimarratu du "gero eta jai indartsuagoak" ari direla bilakatzen, urtez urte "hobera" doazela, baina jende berria ere esku zabalik jasoko dutela. "Beraz, animatu! Ateak zabalik daude".
