Asteleheneko mahai-ingurua "oso interesgarria" izen zela aitortu du Iriartek, eta Kulturate lepo bete zen, gainera, solasaldiaz gozatzeko. Martitzenean ere "bisita ugari" izan zituzten BAZen, erretiratuen elkarteetako kartel erakusketan.
Eguaztenari dagokionez, Seber Altubeko azokan lau erretiratuen elkarteetako ordezkaritza egon zen. Hala ere, "nahiko jende gutxi" ibili zen. Arratsaldean, ordea, Kulturate jendez bete zen osasungintza publikoari buruzko hitzaldia entzuteko.
Sasoibidekoen eskutik, bestalde, ipar martxako hastapen ikastaroak egin dituzte Monterronen eta atzo, eguena, ibilaldi berezia ere egin zuten. Era berean, Iturbide egoitzakoekin irteera egitekoak ziren baina, eguraldi bustia zela-eta, bingoan aritu ziren, eta Arizmendi Ikastolako erizaintzako ikasleak ere egon ziren.
Orain arteko balorazioa, beraz, "oso positiboa" da. "Asko eskertzen diegu arrasatear guztiei gure ekintzetan parte hartu izana. Oso pozik gaude", azaldu du Iriartek.
Bihar, egun handia
Edozelan ere, orain ez da bukatu eta badituzte ekintza batzuk aurretik. Gaur, 12:00etan, ostalaritza tailerra egingo dute Sartei tabernan eta bihar, zapatua, emango diote amaiera egitarauari. Izan ere, Pertsona Nagusien Nazioarteko Eguna da bihar eta manifestua irakurriko dute 12:30ean. Ondoren, 13:00etan, Herriko Plazan, Puro Relajo taldeak joko du. 19:00etan, Portaloian, Trio Medianocheren txanda izango da. Azkenik, 20:30ean, Arbolapetan, The Song taldeak egingo du emanaldia. Hori bukatzean, urdaiazpikoa dastatzeko aukera ere egongo da.