86. urteurrenean ere, lore eskaintza egingo diete frankismoaren biktimei

Eraildako senideak dituzten debagoiendarrak, pankartarekin.

Irailaren 26an 86 urte beteko dira tropa frankistak Arrasaten sartu zirenetik eta, urtero moduan, Arrasateko Udalak eta Intxorta 1937 Kultur Elkarteak lore eskaintza egingo diete biktimei. Arizmendiarrieta plazako monolitoan izango da ekitaldia, 18:30ean hasita. Horrez gain, Memoria partekatu baterantz. Arrasate 1936-1956, Gerra, Erresistentzia eta Frankismoa liburuaren bigarren argitalpena aurkeztuko dute, 19:00etan Etxaluzen.

2017ko irailean, Arrasateko Udalean ordezkaritza politikoa duten alderdi guztiek osatutako Memoriaren eta Bizikidetzaren Mahaiak Intxorta 1937 Kultur Elkarteari agindu zion 1936-1956 aldian udalerrian gertatutakoari buruzko memoria bat egiteko: Memoria partekatu baterantz. Arrasate 1936-1956, Gerra, Erresistentzia eta Frankismoa.

Intxorta 1937 Elkarteak hainbat hamarkadatan egindako lanak, ikerketak eta bestelako argitalpenak hartzen ditu oinarri liburu horrek. Espainiako diktadura eta Primo de Riveraren Monarkia erori eta Errepublika ezarri zen garaia abiapuntu hartuta.

"Udalerriaren historia berreskuratzeko eta gertatutakoa ezagutarazteko asmoz", beste pauso bat eman dute, liburuaren bigarren edizio bat eginez, herritar askoren testigantza berriekin osatuta. Modu horretan, 100 bat orrialde gehiago ditu orain idazlanak. Liburua modu digitalean irakur daiteke www.arrasate.eus eta www.intxorta.org webguneetan eta irailaren 26an formatu fisikoan eskuratu ahal izango dira.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.