Bi urtetik behin egin ohi dute Besaide Mendizale Elkarteak antolatutako Aiba! mendi martxa eta, iazko etenaren ostean, aurten egiteko moduan dira. Gainera, beteranoen erreleboa hartuta, lantalde berriarekin itzuliko da martxa, indarberrituta, eta berrikuntzekin. Urriaren 2an egingo dute, 07:00etan Biteri plazatik irtenda.
Berrikuntza moduan, aurtengo ibilbide luzea, 41 kilometro eta 2.900 metroko desnibel positiboa duena, Euskal Mendi Federazioaren Iraupen Luzeko Ibilbideen zirkuituaren barnean dago. "Hortaz, espero dugu aurtengoa ere, edizio arrakastatsua izatea", azaldu dute antolatzaileek. Ibilbide laburra, berriz, 34 kilometrokoa izango da, 2.100 metroko desnibelarekin. Aramaio ibarrari buelta emango diete ibilaldi horiekin.
Dagoeneko eman daiteke izena, hemen, irailaren 25era arte. Era berean, kopurua aurrez beteko ez balitz, egunean bertan ere egongo da horretarako aukera, Biteri plazan bertan.
