MUk sari bat eskuratu du Bilgarri eta Enbalajearen Diseinu eta Jasangarritasun Sari Nazionalaren XIII. edizioan

Mondragon Unibertsitateko Oxel Pereda, Jon Zamakola eta Danel Cid ikasleak saria jasotzen. (Argazkia: MU)

Mondragon Unibertsitateko Industria Diseinuko 3. mailako Oxel Pereda, Jon Zamakola eta Danel Cid ikasleek irabazi dute accesit saria Solan de Cabras enpresak proposatutako proiektu batekin. Hainbat enpresek proposatu dituzte proiektuak, eta proposamen bakoitzak sari bat edo gehiago izan ditu. MUko taldeak irabazitako sari horrekin, Graphispack elkarteak eta Bartzelonako Firako Hispack aretoak antolatutako Liderpack sari profesionaletarako sailkatu da proiektua.

Bilgarri eta Enbalajearen Berrikuntza Klusterrak antolatu du Bilgarri eta Enbalajearen Diseinu eta Jasangarritasun Sari Nazionalen XIII. edizioa. Ubesol, Solan de Cabas, Trolli, Grupo la Plana eta J2 Servid enpresek proposatu dizkiete euren erronkak ikasleei.

Mondragon Unibertsitateko Industria Diseinuko Oxel Pereda, Jon Zamakola eta Danel Cid ikasleen Solan Eco Can proiektuak lortu du sarietako bat. Solan de Cabrasen baldintzak kontuan hartuta sortu dute euren edukiontzia. Ur enpresa horrek edukiera handiko formatu jasangarria bilatzen zuen etxeko ur-kontsumoari begira, bilgarri eta plastikoen erabilera murrizteko. Horregatik, eskatzen zuena zen zortzi eta hamabi litro bitarteko bilgarria %100 birziklagarria izatea, etxean metatzeko eta hozkailuan gordetzeko modukoa izatea, eta bertatik edalontzira zuzenean zerbitzatu ahal izatea. Horrekin batera, markaren identitatea islatu behar zuen lanak.

Solan Eco Can proiektuak betekizunak bete ditu. Jasangarritasuna ematen dion landare-polimero bat da edukiontzia, kanpoan zur-pulpaz egindako geruza batez indartuta. Forma errektangularra du, hortaz, hainbat posiziotan jar daiteke hozkailuan. Leku-aldatzeko bi heldu leku ditu albo banatan. Gainera, iturria du ura, zuzenean, edalontzi batera botatzeko.

Oxel Peredak, Jon Zamakolak eta Danel Cidek egindako 'Solan Eco Can' proiektua. (Argazkia: MU)

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.