Osoko bilkura amaitzear zela, Peter Encinas herritarrak adierazpen askatasunaren gaia atera zuen, Monterrongo burdin hesian pankartak jarri ahal izatea eskatuz. Eva Abuin Podemos Arrasateren bozeramaileak ere adierazpen askatasunean jarri zuen fokua eta, horri erantzunez, Martin Garcia sozialistak askatasun hori guztientzako izan behar dela aurpegiratu zion Abuini, domekan Matilde Martin "bahituta" eduki zutela salatuz.
Santa Marinako auzo-alkateak bere alderdikide esandakoa berretsi zuen eta, bere lekutik jaiki eta mahaian hainbat golpe joz, EH Bilduko udal ordezkariei ere aurpegiratu zien "bahiketa" hura.
Barkamena eskatu dute
Akusazio horien ostean, Podemos Arrasatek "berehalako zuzenketa" eskatu zien sozialistei eta hauek prentsa agerraldi bat egin zuten Abuini eta Podemos Arrasateri barkamena eskatu eta bahitu hitza egokia izan ez zela onartzeko. Edozelan ere, azpimarratu zuen barkamena soilik Podemos Arrasaterentzat dela, eta ez EH Bildurentzat.
Domekako gertaera
Joan den asteburuan Santa Marina auzoko jaiak ospatu zituzten eta testuinguru horretan gertatu zen auzo-alkateak osoko bilkuran salatutakoa. Haren hitzetan, erretiratuen bazkaritik auzo-alkatetzara itzuli zenean, "presoen aldeko pertsona talde bat" zegoen han. "Une hartan, joateko eskatu nien eta haiek ezetz erantzun ostean, ika-mika sortu zen gure artean [...]. Lokalean sartu nintzen eta haiek ate aurrean geratu ziren". Gaineratu du irteteko "mugatuta" sentitu zela, nahiz eta nabarmendu duen ez ziotela atea itxi, hau da, ez zutela bahitu. Horregatik zuzendu ditu martitzeneko hitzak.
