Arrasate Blues kartel zabalaren barruan tokia egin dio Ibai-artek EIJO taldeari. 2014an sortu zuten EAEko musika eskola eta kontserbatorioetan ikasi izan duten zenbait musikarik. Gaur egun, 32 lagun inguruz dago osatuta, eta jazz estiloaren ohiko instrumentuei alboka, txistua, trikitia eta halako euskal musika tresnak gehitu dizkiete.
Izan ere, Iñaki Askunze, Carlos Sagi eta Sergi Verges konpositoreek orkestrarentzat propio sortutako konponketak interpretatzen dituzte; euskal kantutegi tradizionalean oinarrituta horietako zenbait. Hori horrela, 70 minutuko errepertorioa eskainiko du "soinu eta instrumentazio aldetik munduan bakarra den" bandak.
Uztailaren 14an, eguena, sartuko da jaialdia erritmo bete-betean. Itxaso Gaztelugatxeren ahots erakargarria entzun ahalko da Herriko Plazan, 19:00etan, eta 20:30ean, Ordiziako Starblues-en melodiek girotuko dute Kulturate osteko txokoa, Otalora Lizentziadunan.