Duela minutu gutxi hasi dute Espainiako Txapelketa absolutuaren pertikako saioa, eta dominengatik borrokan izango dira bi arrasatear, Malen Ruiz de Azua (Valentzia Sport) eta Maialen Axpe (Atletico San Sebastian). Biak ala biak, bestela ere, txapelketa irabazteko faboritoen taldean daude, baina joan den eguaztenean Iruñean egin zuten Jose Luis Hernandez txapelketan 4,45eko saltoa eginda Ruiz de Azuak kolpea eman zuen mahai gainean –urteko marka onena da–.
Izan ere, Valentzia Sport taldeko atleta, orain arte, entrenamenduetako lan-saio onak txapelketetara eraman ezinda zebilen. Maialen Axperi, berriz, iaz Getafen (4,37) irabazitako urrezko domina defendatzea dagokio; aurten ez du marka pertsonaletik gertu ibiltzeko aukerarik izan –4,20 egin du–, baina Bedoñakoa da aire zabaleko azken txapelduna.
