Berrikuntza modura, herri batzordeaz gain, gazte batzordea ere sortu dute aurten, gazteak Euskaraldira gerturatzeko helburuarekin. "Alde batetik, egutegi bat zehaztu dugu, gazteak batzen dituzten ekintzak identifikatuz, eta horietan saiakera berezi bat egingo dugu gazteak Euskaraldira erakartzeko", azaldu du Ikuska Lizarraldek, Euskaraldiaren Arrasateko dinamizatzaileak.
Bestalde, kuadrilla sarea osatu gura dute. "Asmoa da kuadrilla eta lagun taldeetan euskararekiko atxikimendu berezia duten pertsona pare bat identifikatzea, horiekin bilera bat egin eta guztia ondo azaltzeko. Modu horretan, haien ardura izango litzateke haien kuadrilletan informazio hori zabaltzea, sare bat osatzen joateko. Izan ere, oso zaila zaigu herritar talde guztietara iristea", nabarmendu du Lizarraldek.
Gazte batzordetik irtendako ekimena da txosnaguneko markoarena ere.
