Azkenaldian, bluesaren, rhythm and bluesaren eta boogie-woogiearen panoraman formatu onenetako eta baloratuenetako bat bihurtu da. 2019an, esaterako, bigarren talde onenaren saria jaso zuen Asconako (Suitza) Jazzaldi Internazionalean. Taldekideek musika beltzaren hizkuntzaren "ezagutza zabala, aberatsa eta askotarikoa dute", antolatzaileen esanetan.
Ekitaldia Arrasate Blues zigilua daramaten poloak eta garagardoak aurkezteko ere baliatuko dute. Azken egunotan Ibai-arteko dendetan erosi duten bezeroek poloak eskuratzeko zozketa batean hartu dute parte, eta Herriko Plazan guztira 100 kamiseta banatuko dizkiete saridunei.
