Jai giro ederrean batu dira Arrasate Herri Eskolako ikasleak, irakasleak, gurasoak eta bestelako senideak Guraso Elkarteak antolatutako ikasturte amaierako jaian parte hartzeko. "Gure eskola kalera atera eta ikustaraztea da jaiaren asmoa, eta bide batez, festa giroan ikasturteari bukaera polita ematea", azaldu du Arrasate Herri Eskolako Guraso Elkarteko lehendakari Eli Egañak.
Denetarikoak izan dira aukeran, puzgarriak, eskulanak egiteko txokoak eta herriko Kontukabi hirukotearen antzerki emanaldia, horien artean, eta dantzan borobildu dute jaialdia AZ Gaubelak taldearen doinuekin. Bustantxo, Arrasate Herri Eskolako maskota, ere han izan da eta eskolako irakasleek eta gurasoek sortutako eskolako kantua ere abestu dute elkarrekin. "Giro oso polita izan dugu, sekulako gogoa genuen bi urteren ostean eskola kalera ateratzeko".
Zozketako irabazleak
Eskolako kamisetak eta zozketarako txartelak erosteko aukera izan da eta honako zenbaki horiek izan dira irabazleak:
Lehenengo saria: 1502
Bigarren saria: 1103
Hirugarren saria: 0368, 0822, 0786, 0872, 2827 eta 3268.