"Gure garaia ulertu eta ditugun erronkak aletzeko gakoak partekatuko ditu Floren Aoizek, Idoia Zengotitabengoak egindako galdera sorta jasotzen duen liburua oinarri hartuta", diote antolatzaileek.
Liburuxka horretan, mamuaren irudia darabilte kapitalismo neoliberala eta horrek artikulatzen dituen zapalkuntzak izendatzeko. "Horrela, neoliberalismoaren ezaugarritzea eta ibilbidea aztertzen dute, kapitalismoarekin dituen loturak eta gizartean zer modutan eragiten duen agerian uzteko".
Adierazi dutenez, ideia bat nagusitzen da gogoetan, besteen gainetik: "Neoliberalismoa herritarren burujabetza neutralizatzeko estrategia den heinean, herriaren eta herritarren burujabetza da neoliberalismotik harago egiteko gakoa. Neoliberalismo desdemokratizatzaileari, beraz, bazter guztietara zabaldu beharreko errotiko demokratizazioaz erantzun beharko zaio".
Dagoeneko irakurgaia eskuragarri dago Irati Topalekuan. Solasaldia, esan moduan, ekainaren 8an izango da, 19:00etan.
