Mondragon Unibertsitateak eta Bilboko Udalak Jose Maria Arizmendiarrietaren omenezko eskultura inauguratu zuten eguaztenean AS Fabrik campusean; gradu-titulazioak eta unibertsitate-masterrak eskaintzen ditu han MUk, 2021eko urtarrilaz geroztik, Bilboko Udalarekin duen lankidetzari esker.
Unibertsitateko ordezkaritzarekin batera, Bilboko alkate Juan Mari Aburto izan zen eskulturaren inaugurazioan, baita Mondragoneko presidente Iñigo Ucin eta Arizmendiarrietaren hainbat senide ere.
Gaur egun, zazpi unibertsitate-titulu ematen dituzte Bilbao AS Fabrik campusean, eta "ekintzailetza- eta berrikuntza-ekosistema" gisa definitzen dute: "Unibertsitate-prestakuntza eta enpresa-ekimen berritzaileen eragileen komunitatea uztartzen ditu". MUren 6.022 ikasleetatik 643 ari dira Bilbon gradu edo master ikasketak egiten.