ELA sindikatuak Aita Menni ospitaleko zein kanpoko zentroetako langileak grebara deitu ditu berriz. Maiatzaren 30etik ekainaren 3ra, bost greba egun izango dira, eta orotara, 33 izango dira duela lau urte hasi zen gatazkatik egindako lanuzteak.
Enpresa batzordearen gehiengoa duen sindikatuak ohar bidez adierazi duenez, "gero eta larriagoa da langileek bizi duten egoera". Horren adibide, 30 milioi euro inbertitu ditu ospitaleak eraikin berrietan, senide eta pazienteak "aintzat hartu gabe", zuzendaritzak unitate batzuetako postuak "beteko ez dituela" jakinaraztearekin batera. ELAk dioenez, martxoan izan zuten azken bilera, eta geroztik ez dute "proposamen berririk" jaso. "Lan Harremanen Kontseilura ere deituko dituztela adierazi dute medioetan eta langileen artean, baina enpresa batzordeko kideei ez diete ezer esan", gaineratu dute.
Erakundeei eskaria
Eusko Jaurlaritzako Osasun Sailarekin eta EAEko aldundiekin kontzertazioak dituen arren, "instituzioek entzungor egiten diote gatazkari" sindikatuaren arabera. Ondorioz, erakundeei "arduraz jokatzeko" eskatu die, eta gatazkari "benetako irtenbidea" emateko borondatea dutela berretsi dute.
