"Ni horrelakoa naiz film laburrak trans neska baten istorioa kontatzen du. Trantsizioa egiteko pausoa eman badu ere eta horretaz harro badago ere, oraindik beldur da", diote egileek. "Beldur horietako bat da gaur egungo mutil-lagunari esatea trans neska bat dela. Baina egoera hori erabat aldatuko da bere neska-lagun ohiaren agerpenarekin, bere iragan guztia ezagutzen duena".
Maite Diosdado arrasatearra proiektuaren produktorea da, eta bere lana "benetan bikain" egiten du, taldekideen esanetan. "Hainbat marka eta enpresa gure proiektuaren babesleak izatea lortu du: Alzola, Bascook, Basque Select, Las casas de la cascada, Sagardoetxea museoa, Txalaparta, Ñam eta abar".
Proiektua aurrera atera ahal izateko, crowdfunding kanpaina abiatu dute. "Kanpaina horren helburua da film laburrak duen 3.000 euroko aurrekontuari aurre egitea".
Sare sozialetan ere aktibo daude, Twitter, Facebook eta Instagramen.
