Astelehen goizaldean kamioi handi batek Bojadorko (Mendebaldeko Sahara) etxebizitza pribatu bati eraso egin zion, kalte material larriak sorraraziz. Komunitate saharauiaren arabera, Sultana Jayaren aurkako hilketa saiakera izan zen, ekintzaile sahararrak bertan baitzeraman etxeko atxiloaldia: "Marokoko indar errepresiboek duela urte eta erdi baino gehiago behartu zuten Sultana egoera horretara, eta ez da lehen aldia halako eraso bat jasaten duena", adierazi dute elkarretaratzean.
Ekintzaile saharauia bere familiarekin eta estatubatuar aktibistekin bizi zen etxe horretan. Aktibista horiek gose greban daude maiatzaren 4tik, Jayak bizi duen egoera salatzeko.
Arrasateko EH Bilduko eta Podemos Arrasateko zinegotziak babesa ematen egon dira. Eva Abuinek, Podemos Arrasateko kideak, adierazi du komunitate saharauiaren bidez jakin duela gertaeraren berri, "prentsa orokorrean ez duelako islarik izan".
