Eako Poesia Egunaren enkarguz sortu zen bien arteko kolaborazioa, eta Ean bertan estreinatu zuten lana. Orain, egileek sortutako irakurraldi-performance-a hainbat plazatan taularatzen ari dira eta maiatzaren 27an, egubakoitza, Kulturateko areto nagusian izango dira, Emakume Txokoak antolatuta. 19:00etan izango da saioa, euskaraz.
Mari Luz Estebanek eta Metrokoadroka kolektiboak elkarrekin egindako emanaldiak liburuko poemak dakartza oholtzara. Era berean, irakurketa momentuak uztartu dituzte poema bisual eta antzeztuekin. Biolinaren musika, pintura, antzerkia eta koreografia performatiboak eta abarrak modu umoretsu zein aldarrikatzailean tartekatuz, emanaldi hunkigarria osatu dute. Mari Luz Estebanekin batera, Ainhoa Alberdi, Idoia Beratarbide, Iraia Elias eta Jurdana Otxoa dira artistak.
Mari Luz Estebanek honakoa dio Andrezaharraren manifestua liburuan:
"Ez diot uko egiten zaharra naizela aitortzeari ZA-HA-RRA.
Hitz hori letreiatzen dut astiro.
Haren loditasuna dastatzen dut, haren sonoritatea.
Hemen naiz.
Begira nazazu".
Asmo horri jarraika, bost emakume, bost gorputz, bost andrezahar ikusiko ditugu
oholtza gainean, haien sentimenduak dastatzen, publikoaren begiradaren aurrean
agertzen. Bost dira… edo hamaika.